細漢的時陣，
阮阿爸阿母 欲晟養阮這五个囡仔大漢，
實在是一件擔頭誠重的代誌。
火夾佇阮兜來講 ，絕對毋是歹銅舊錫的粗俗物仔爾爾！
伊絕對是阮這囗灶做伙拍拚，上好的見證！
阮家族仔是作田起家的古意人。
為著顧三頓，作田 、種菜閣兼飼豬。
就按呢！厝内囡仔嘛攏會曉那讀册那去米絞袋粗糠轉來燃火。
彼時陣，大灶定定愛燃柴、煠番薯、飼豬、閣兼燃燒水洗身軀｡
阮不時就愛攑火夾來顧大灶的火，
嘛順紲顧家己的腹肚｡彼當時 ，頭份的六合國小 有當時仔愛讀下晡的課，這時陣，大灶内底燒燙燙的番薯就是阮中晝頓治枵上好的食物矣。
一支火夾 , 一世情 ｡
這馬文生家族的囝兒序細攏大漢出社會矣！
阮雙手合十，誠懇感恩火夾，感恩萬物，感恩阮的阿爸佮阿母的辛苦晟養，予阮平安、順序，長大成人｡
向望文生家族的每一个成員：逐家認真拍拚
，做一个有出脱、有貢獻的好囝，好好仔報答序大遮爾濟、遮爾飽滇的恩情！
